အက်စတွန်ဗီလာအသင်းခေါင်းဆောင် ဂရီးလစ်ရှ်အနေဖြင့် (၂)ပတ်ခန့် ထပ်မံအနားယူရမည်ဖြစ်ကြောင်း အသင်းနည်းပြ ဒန်းစမစ်က အတည်ပြုပြောကြားခဲ့သည်။
အသက် (၂၅)နှစ်အရွယ်ရှိ ဂရီးလစ်ရှ်သည် အသင်း၏လေ့ကျင့်ရေးအစီအစဉ်တွင် ရရှိခဲ့သည့် ခြေသလုံးဒဏ်ရာကြောင့် ဖေဖော်ဝါရီလ (၁၄)ရက်ကတည်းက အနားယူနေခဲ့ရပြီး အသင်း၏ပွဲစဉ် (၇)ပွဲကို လွဲချော်ခဲ့သည်။
ဂရီးလစ်ရှ်အနေဖြင့် အဆိုပါဒဏ်ရာမှ ပြန်လည်သက်သာပြီးနောက် အသင်းနှင့်လေ့ကျင့်မှုများ ပြုလုပ်ခဲ့သော်လည်း ယင်းဒဏ်ရာမှာ မကင်းမသေသေးသဖြင့် (၂)ပတ်ခန့် ထပ်မံအနားယူရမည်ဖြစ်ကြောင်း ဒန်းစမစ်က ဆိုခဲ့ခြင်းဖြစ်သည်။
ဒန်းစမစ်က “လီဗာပူးလ်နဲ့ပွဲအတွက် ဂရီးလစ်ရှ် ကြံ့ခိုင်မှုမပြည့်ဝသေးပါဘူး။ သူ့ရဲ့ဒဏ်ရာအခြေအနေနဲ့ပတ်သက်ပြီး ကျွန်တော်တို့ကတော့ အကောင်းမြင်နေဆဲပါ။ သူ့အနေနဲ့ (၂)ပတ်လောက် ထပ်ပြီး အနားယူပြီး အသင်းအတွက် ပြန်ကစားနိုင်မယ်လို့ ထင်ပါတယ်။ ဒီဒဏ်ရာက ကာလရှည်နားရမယ့် ဒဏ်ရာမဟုတ်ပါဘူး။ မကြာခင် ဂရီးလစ်ရှ် ပြန်လာပါလိမ့်မယ်”ဟု ပြောကြားခဲ့သည်။
ဂရီးလစ်ရှ်သည် ယခုရာသီတွင် အက်စတွန်ဗီလာအသင်းအတွက် ခြေစွမ်းပြကစားနေပြီး ပြိုင်ပွဲစုံ (၂၃)ပွဲတွင် (၇)ဂိုး သွင်းယူပေးထားသည်။
