စပါးနည်းပြ မော်ရင်ဟိုက ယခုရာသီ ပရီးမီးယားလိဂ်ပြိုင်ပွဲတွင် ချန်ပီယံလိဂ်ဝင်ခွင့်အတွက် အားပြိုင်မှုမှာ ကျယ်ပြန့်နေသောကြောင့် အဲဗာတန်နှင့်ပွဲမှာ ထိပ်ဆုံး(၄)သင်းစာရင်းဝင်ရေးအတွက် အဆုံးအဖြတ်မဟုတ်ကြောင်း ပြော ကြားခဲ့သည်။
စပါးအသင်းသည် ယခုသောကြာနေ့တွင် အမှတ်ပေးဇယားအထက်အောက်ရပ်တည်နေသော အဲဗာတန်အသင်းနှင့် အဝေးကွင်းပွဲစဉ် ယှဉ်ပြိုင်ကစားရမည်ဖြစ်ပြီး ချန်ပီယံလိဂ်ဝင်ခွင့်အတွက် အမှတ်လုပွဲဖြစ်ကြောင်း သုံးသပ်မှုများရှိနေသည်။
မော်ရင်ဟိုက ”ကျွန်တော်တို့က အလွန်နီးကပ်တဲ့ ပြိုင်ဘက်တွေပါ။ ဒါပေမဲ့ ကျွန်တော်တို့ဝန်းကျင်မှာ တခြားအသင်းတွေလည်း အများကြီးရှိနေပါတယ်။ တချို့အသင်းတွေက အမှတ်ပိုရထားပြီး တချို့အသင်းတွေက ကျွန်တော်တို့ထက် အမှတ်နည်းနေပါတယ်။ ဒါပေမဲ့ ကျွန်တော်တို့ နောက်ထပ်အမှတ်(၂၀)ကျော်အတွက် ယှဉ်ပြိုင်ရဦးမှာပါ။ ဒါကြောင့် ပြိုင်ဆိုင်မှုက ကျယ်ပြန့်နေတယ်လို့ ထင်ပါတယ်။ ဒီအတွက် အဲဗာတန်နဲ့ပွဲကလည်း အဆုံးအဖြတ်မဖြစ်နိုင်ပါဘူး။ အနိုင်ရတဲ့အသင်း အခွင့်အရေးပိုသာသွားရုံပါပဲ” ဟု ပြောကြားခဲ့သည်။
မော်ရင်ဟိုသည် ယခုရာသီတွင် စပါးအသင်းကို ချန်ပီယံလိဂ်ဝင်ခွင့်ရရှိအောင် စွမ်းဆောင်ပေးနိုင်ခြင်းမရှိပါက ရာထူးမှ ထုတ်ပယ်ခံရဖွယ်ရှိသည်ဟု ထင်ကြေးပေးခံနေရကြောင်းလည်း သိရသည်။
