ဝက်စ်ဟမ်းအသင်း၏ အင်္ဂလန်လက်ရွေးစင်ကွင်းလယ်တိုက်စစ်ကစားသမား လင်ဂတ်သည် နယူးကာဆယ်အသင်းအား (၂-၃)ဂိုးဖြင့်ရှုံးနိမ့်ခဲ့သည့် ပရီးမီးယားလိဂ်ပွဲစဉ်တွင် အသင်းအတွက် ချေပဂိုး (၁)ဂိုးသွင်းယူနိုင်ခဲ့ပြီးနောက် ယခုရာသီ၎င်း၏ပရီးမီးယားလိဂ်သွင်းဂိုးအရေအတွက်မှာ (၉)ဂိုးအထိရှိလာခဲ့ပြီး ကစားသမားဘဝ တစ်ရာသီအတွင်း အများဆုံးလိဂ်သွင်းဂိုးအရေအတွက်ဖြစ်ခဲ့ကြောင်းသိရသည်။
အသက် (၂၈)နှစ်အရွယ်ရှိ လင်ဂတ်သည် ပြီးခဲ့သည့် ဇန်နဝါရီအပြောင်းအရွှေ့က မန်ယူအသင်းမှ ဝက်စ်ဟမ်းအသင်းသို့ ရာသီဝက်အငှားစာချုပ်ဖြင့်လာရောက်နေသူဖြစ်ပြီး ဝက်စ်ဟမ်းအသင်းအတွက် ပရီးမီးယားလိဂ်ပွဲစဉ် (၁၀)ပွဲသာကစားရသေးချိန်၌ ယခုကဲ့သို့ ကစားသမားဘဝ စံချိန်တင်သွင်းဂိုးအရေအတွက်ကို ရရှိခဲ့ခြင်းဖြစ်သည်။
လင်ဂတ်၏ကစားသမားဘဝ ယခင်တစ်ရာသီအတွင်း ပရီးမီးယားလိဂ်ဂိုးအများဆုံးသွင်းယူနိုင်ခဲ့ခြင်းမှာ ၂၀၁၇-၁၈ ရာသီတွင်ဖြစ်ပြီး မန်ယူအသင်းအတွက် ပရီးမီးယားလိဂ် (၃၃)ပွဲကစားရာတွင် (၈)ဂိုးသွင်းယူနိုင်ခဲ့ခြင်းဖြစ်ခဲ့သည်။
ယခုအခါလင်ဂတ်အနေဖြင့် ဝက်စ်ဟမ်းအသင်းတွင် ယင်းစံချိန်ကို ပရီးမီးယားလိဂ် (၁၀)ပွဲကစားပြီးချိန်၌ပင် ကျော်ဖြတ်နိုင်ခဲ့ခြင်းဖြစ်ပြီး ကစားသမားဘဝ တစ်ရာသီအတွင်း ပြိုင်ပွဲစုံသွင်းဂိုးအများဆုံးစံချိန် (၁၃ ဂိုး၊ ၂၀၁၇-၁၈ ရာသီ)ကိုပါ ကျော်ဖြတ်နိုင်ရန် အခွင့်အရေးရှိနေသည်။
မန်ယူအသင်းတွင် ပုံမှန်နေရာပျောက်ဆုံးနေပြီး ပြီးခဲ့သည့် တစ်ရာသီခွဲကာလအတွင်း ပရီးမီးယားလိဂ်သွင်းဂိုး (၁)ဂိုးသာသွင်းယူနိုင်ခဲ့သည့် လင်ဂတ်သည် ဝက်စ်ဟမ်းအသင်းတွင်မူ အကောင်းဆုံးခြေစွမ်းကိုရရှိနေပြီး အသင်းအတွက် ပရီးမီးယားလိဂ် (၁၀)ပွဲ ကစားပြီးချိန်တွင် ဂိုးပါဝင်ပတ်သက်မှု (၁၂) ဂိုး (၉ ဂိုးသွင်း၊ ၃ ဂိုးဖန်တီး)အထိရှိခဲ့သည်။
ထို့ကြောင့်လင်ဂတ်အနေဖြင့် ဂိုးပါဝင်ပက်သတ်မှု (၁၃)ဂိုး (၈ ဂိုးသွင်း၊ ၅ ဂိုးဖန်တီး)အထိရှိထားခဲ့သော တိုက်စစ်မှူး ဘိုဝမ်အပြီး ယခုရာသီဝက်စ်ဟမ်းအသင်း၏ ပရီးမီးယားလိဂ်ဂိုးပါဝင်ပတ်သက်မှု ဒုတိယအများဆုံးကစားသမားအဖြစ်လည်း ရပ်တည်နေသည်။
