ပရီးမီးယားလိဂ် ဘောလုံး အဖွဲ့ချုပ်ဟာ နှစ် သက်တမ်း ၃၀ ကျော်လာပြီ ဖြစ်တဲ့ သူတို့ရဲ့ ပြိုင်ပွဲ သက်တမ်း တစ်လျောက်မှာ အောင်မြင် ကျော်ကြားခဲ့တဲ့ ကစား သမားတွေကို သီးသန့် ခွဲထုတ်ကာ ဂုဏ်ပြုဖို့ အတွက် Hall of Fame အစီအစဉ် ကို စတင် ခဲ့ ပါတယ် ။ ယမန်နေ့က အထိ Hall of Fame မှာ ကစားသမား ၆ ယောက် ရွေးချယ် ခံထားရပြီး ဒီနှစ် ထဲမှာ စုစုပေါင်း ၈ ယောက် ရွေးချယ် သွားမယ်လို့ သိရ ပါတယ် ။
Hall of Fame စကာတင်မှာ ပါ၀င်တဲ့ ကစား သမားတွေဟာ
နယူးကာဆယ် ယူနိုက်တက် ၊ ဘလက်ဘန်း အသင်းတို့မှာ ကစားပြီး ဒီကနေ့ထိ ပရီးမီးယားလိဂ် ရဲ့ ထာ၀ရ ဂိုးသွင်း ဘုရင် အဖြစ် ရပ်တည်နေတဲ့ အင်္ဂလန် တိုက်စစ်မှူးဟောင်း အလန်ရှီးယား ဟာ Hall of Fame ရဲ့ ပထမဆုံး ရွေးချယ် ခံရသူ ဖြစ်ခဲ့ ပါတယ် ။
သူ့ရဲ့ နောက်မှာတော့ အာဆင်နယ် နဲ့ အတူ ၂၀၀၄ ရှုံးပွဲမရှိ ရွှေဖလား အပါအ၀င် အောင်မြင်မှု များစွာ ရယူခဲ့ပြီး ပရီးမီးယားလိဂ် သမိုင်း တစ်လျောက် အကောင်းဆုံး နိုင်ငံခြားသား ( ဗြိတိန်ပြင်ပ ) အဖြစ် သတ်မှတ် ခံခဲ့ရတဲ့ ပြင်သစ် တိုက်စစ်မှူး သီယာရီ အွန်နရီ ဟာ ဒုတိယမြောက် Hall of Fame ကစားသမား ဖြစ်လာခဲ့ ပါတယ် ။
အဲ့ဒိ နောက်မှာတော့ မန်ချက်စတာ ယူနိုက်တက် ဂန္ထ၀င် ၂ ဦး ဖြစ်တဲ့ အဲရစ်ကန်တိုနာ နဲ့ ရွိုင်ကင်း ၊ အာဆင်နယ် ဂန္ထ၀င် ဒင်းနစ် ဘားကင့် ၊ ချဲလ်ဆီး ဂန္ထ၀င် ဖရန့် လမ်းပတ် တို့ ဟာ ရှီးယား ၊ အွန်နရီ တို့နဲ့ အတူ Hall of Fame ရဲ့ စာရင်း၀င်တွေ ဖြစ်လာခဲ့ကြ ပါတယ် ။
ဒီလိုစာရင်း ထုတ်ပြန်ချိန် မှာတော့ ဘောလုံး ဝါသနာရှင် ပရိသတ် အချို့အတွက် ဒွိဟ ဖြစ်စရာ မေးခွန်း တစ်ခု ပေါ်လာခဲ့ ပါတယ် ။ အဲ့ဒါ ကတော့ ရိုင်ယန်ဂစ် မပါဘူးလား ဆိုတာ ပါပဲ ။ ဂစ် ဟာ လက်ရှိ ရွေးချယ် ခံရသူတွေ ထဲမှာ မပါသလို စကာတင် ကစားသမား ၂၄ ဦး ထဲမှာတောင် ပါ၀င် မလာခဲ့တာဟာ ပရိသတ်တွေကို အံ့အားသင့်ပြီး နားလည်ရ ခက်စေခဲ့ ပါတယ် ။
ဘာကြောင့်လည်း ဆိုရင်တော့ ရိုင်ယန်ဂစ် ဟာ ပရီးမီးယားလိဂ် ရဲ့ အအောင်မြင်ဆုံး ကစားသမား ဖြစ်ခဲ့လို့ ပါပဲ ။ သူဟာ မန်ချက်စတာ ယူနိုက်တက် နဲ့ အတူ ပရီးမီးယားလိဂ် မှာ ၂၆ နှစ်ကြာအောင် ကစား သွားခဲ့ပြီး အမှတ်ပေး ချန်ပီယံ ဆုကို ၁၃ ကြိမ် နဲ့ အရေအတွက် အများဆုံး ရယူသူ အဖြစ် မှတ်တမ်း ၀င်ထားခဲ့ ပါတယ် ။
ဂစ် ဟာ မန်ယူနိုက်တက် နဲ့ ပွဲပေါင်း ၁၀၀၀ ကျော် ကစားခဲ့သလို FA Cup, League Cup, Community Shield ၊ ချန်ပီယံလိဂ် နဲ့ ကလပ် ကမ္ဘာ့ ဖလား စတဲ့ ဆုဖလား တွေကိုလည်း ရယူပိုင်ဆိုင် ထားနိုင်ခဲ့ ပါတယ် ။ ဒါကြောင့် ဒီစာရင်းမှာ ရိုင်ယန်ဂစ် ပါ၀င် မလာခဲ့တာဟာ ပရိသတ်တွေ အတွက် မေးခွန်း ထုတ်စရာ ဖြစ်လာခဲ့ ပါတယ် ။
တကယ်တမ်း မှာတော့ ဂစ် ဟာ ပထမဆုံး ရွေးချယ် တဲ့ Hall of Fame ၂ ဦး အတွက် ထိပ်ဆုံးက ဦးစားပေး သတ်မှတ် ခံခဲ့ရသူပါ ။ ရွေးချယ်ရေး အဖွဲ့ဟာ ရိုင်ယန်ဂစ် နဲ့ အလန် ရှီးယား တို့ ကို ပထမဆုံး Hall of Fame တွေ အဖြစ် ရွေးချယ် ထားပြီး သတ်မှတ်ရက်မှာ ကြေငြာဖို့ အတွက် ပြင်ဆင် ထားခဲ့ ပါတယ် ။
ဒါပေမယ့် အမျိုးသမီး ၂ ဦး ကို ကိုယ်ထိ လက်ရောက် ရိုက်နှက်ကျူးလွန်မှု နဲ့ ရိုင်ယန်ဂစ် စွဲချက်တင်ခံရ အပြီး မှာတော့ ဝေးလ် လက်ရွေးစင် နည်းပြကြီးကို ဒီစာရင်း ကနေ ချန်လှပ်ဖို့ Hall of Fame တာ၀န်ရှိသူတွေက ဆုံးဖြတ် ခဲ့ကြပါတယ် ။ ဒါကြောင့် ရိုင်ယန်ဂစ် ရဲ့ နေရာမှာ သီယာရီ အွန်နရီ ကို အစားထိုး ထည့်သွင်း ခဲ့တာပါပဲ ။
ဂစ် ဟာ ဘောလုံး သမား အဖြစ် နဲ့ မြက်ခင်းပြင်ပေါ်မှာ အောင်မြင် ခဲ့ပါတယ် ။ သူ့ရဲ့ ကလပ် ကစား သမား ဘ၀ နှစ် ၃၀ နီးပါးမှာ အနီကတ် တစ်ကြိမ်မှ မထိခဲ့သလို ပွဲပေါင်း ၁၀၀၀ ကျော် ကစားနိုင်ပြီး ဆုဖလား များစွာ ရယူ နိုင်တဲ့ ထိပ်တန်း ကစားသမား လက်တစ်ဆုပ် စာရင်းမှာလည်း ပါ၀င်ခဲ့ ပါတယ် ။ ယူနိုက်တက် ပရိသတ်တွေ ကလည်း အခုချိန်ထိ ရိုင်ယန်ဂစ် ကို ချစ်မြတ်နိုး နေကြဆဲပါ ။
ဒါပေမယ့် ကွင်းပြင်ပ လူနေမှု ဘ၀က လုပ်ရပ်တွေ ကတော့ ရိုင်ယန်ဂစ် ရဲ့ အရောင်တောက်ပတဲ့ အောင်မြင်မှုတွေ ကို မှေးမှိန်စေခဲ့ ပါတယ် ။ ညီဖြစ်သူရဲ့ ဇနီး နဲ့ နှစ်ပေါင်းများစွာ ဖောက်ပြန် ခဲ့လို့ အရှက်ရခဲ့ သလို အခုလို အမျိုးသမီးတွေကို ကိုယ်ထိလက်ရောက် ကျူးလွန်ခဲ့မှုတွေဟာ ဂစ် ကို အောင်မြင်ကျော်ကြား ကစားသမား တစ်ဦးအဖြစ် ဂုဏ်ယူ ၀င့်ကြွားစွာ ဖော်ပြဖို့ အဟန့်အတား ဖြစ်လာစေခဲ့ ပါတယ် ။
နောက်ဆုံး မှာတော့ ရိုင်ယန်ဂစ် ဟာ မြက်ခင်းပေါ်က ခြေစွမ်းတွေ အတွက် ချီးကျူးခံခဲ့ရသလို မြက်ခင်းပြင်ပက လုပ်ရပ်တွေကြောင့် ရှုံ့ချ ခံခဲ့ရသူ ဖြစ်လာခဲ့ ပါပြီ ။
