စကော့တလန်ပရီးမီးယားရှစ်ပြိုင်ပွဲ ချန်ပီယံ ရိန်းဂျားစ်အသင်းနည်းပြ စတီဗင်ဂျရတ်သည် ၂၀၂၀-၂၀၂၁ ရာသီ အကောင်းဆုံး မန်နေဂျာဆုကို ဆွတ်ခူးရရှိခဲ့ကြောင်း သိရသည်။
လီဗာပူးလ်နှင့် အင်္ဂလန်လက်ရွေးစင် အသင်းခေါင်းဆောင်ဟောင်းဖြစ်သူ စတီဗင်ဂျရတ် (၄၀ နှစ်) သည် ရိန်းဂျားစ်အသင်းအား ဆယ်စုနှစ်တစ်ခုကြာဝေးကွာနေသည့် အမှတ်ပေးချန်ပီယံဆု တစ်ကျော့ပြန် ဆွတ်ခူးရရှိစေရန် စွမ်းဆောင်ပေးနိုင်သဖြင့် တစ်နှစ်တာ အကောင်းဆုံးမန်နေဂျာဆု ချီးမြှင့်ခံရခြင်း ဖြစ်သည်။ ဂျရတ်သည် ရိန်းဂျားစ်အသင်းအား ၂၀၁၈ ခုနှစ် နွေရာသီတွင် စတင်တာဝန်ယူ ကိုင်တွယ်ခဲ့ပြီး သုံးရာသီအကြာတွင် ချန်ပီယံဆု ရယူပေးခဲ့ခြင်းဖြစ်သည်။
ရိန်းဂျားစ်အသင်းသည် ၂၀၂၀-၂၁ ရာသီ စကော့တစ်ရှ်ပရီးယားရှစ်ပြိုင်ပွဲ၏ နောက်ဆုံးပွဲစဉ်တွင် အဘာဒင်းအသင်းအား အိမ်ကွင်းတွင် (၄-ဝ)ဂိုးဖြင့်အနိုင်ရခဲ့ပြီးနောက် တစ်ရာသီအတွင်း အမှတ်ပေးပြိုင်ပွဲရှုံးပွဲမရှိချန်ပီယံအဖြစ် အောင်ပွဲခံနိုင်ခဲ့သည်။
ဂျရတ်ကိုင်တွယ်နေသည့် ရိန်းဂျားစ်အသင်းသည် ၂၀၂၀-၂၁ ရာသီ စကော့တစ်ရှ်ပရီးမီးယားရှစ်ပြိုင်ပွဲတွင် ပွဲစဉ် (၃၈)ပွဲကစားပြီးချိန်၌ (၃၂)ပွဲနိုင်၊ (၆)ပွဲသရေ၊ရဂိုး (၉၂)ဂိုး၊ ပေးဂိုး (၁၃)ဂိုး၊ ရမှတ် (၁၀၂)မှတ်အထိရရှိကာ အသင်းသမိုင်းတစ်လျှောက် အအောင်မြင်ဆုံးရာသီကို ပိုင်ဆိုင်ခဲ့ခြင်းလည်းဖြစ်သည်။
ဂျရတ်သည် ပြီးခဲ့သည့်ရက်ပိုင်းတွင် စကော့တလန်ဘောလုံးကလောင် ရှင်များအဖွဲ့ချုပ် (SFWA) က ချီးမြှင့်သည့် တစ်ရာသီအကောင်းဆုံးနည်းပြဆု ရရှိထားပြီးဖြစ်ရာ တစ်ပတ်အတွင်း ဆုနှစ်ခုဆွတ်ခူးရရှိခဲ့ခြင်းလည်းဖြစ်သည်။
ထို့ပြင် ရိန်းဂျားစ်အသင်းအတွက် လက်စွမ်းပြကစားခဲ့သည့် ၀ါရင့်ဂိုးသမား အယ်လန်မက်ဂရီဂေါ် (၃၉ နှစ်) မှာလည်း ၂၀၂၀-၂၀၂၁ ရာသီ စကော့တလန်ပရီးမီးယားရှစ်ပြိုင်ပွဲ၏ အကောင်းဆုံးကစားသမားဆု ဆွတ်ခူးရရှိခဲ့ကြောင်း သိရသည်။ မက်ဂရီဂေါ်သည် ရာသီပိတ်ပွဲစဉ်မတိုင်ခင်အထိ ၂၆ ပွဲကစား ရာတွင် ၁၃ ဂိုးသာ ခွင့်ပြုထားရသဖြင့် ယင်းဆုအားဆွတ်ခူးရရှိခြင်းဖြစ်သည်။
