လက်စတာ(၂-၁)ခရစ္စတယ်ပဲလေ့စ်ပွဲတွင် လက်စတာအသင်းအတွက် အနိုင်ဂိုး ဖြစ်စေခဲ့သည့် အီဟီယန်နာချို၏သွင်းဂိုးအား အသင်းနည်းပြဖြစ်သူ ဘရန်ဒန်ရော်ဂျာက ချီးကျူးစကားပြောကြားခဲ့သည်။
လက်စတာအသင်းသည် ပဲလေ့စ်နှင့်ပွဲတွင် နိုင်ပွဲဆက်နိုင်မှုကြောင့် လာမည့်ရာသီ ချန်ပီယံလိဂ်ဝင်ခွင့်ရရှိရန် ပိုမိုနီးစပ်လာခဲ့သည်။ ယင်းပွဲ၌ လက်စတာအသင်းအနေဖြင့် ၁၂ မိနစ်တွင် ပဲလေ့စ်အသင်းမှ ဇာဟာ သွင်းယူသည့်ဂိုးကြောင့် နောက်မှ လိုက်ကစားခဲ့ရသော်လည်း ကက်စတာညာ(၅၀ မိနစ်)၊ အီဟီယန်နာချို(၈၀ မိနစ်)တို့က ချေပဂိုးနှင့် အနိုင်ဂိုးများ သွင်းယူပေးခဲ့ခြင်းဖြစ်သည်။
“(အီဟီယန်နာချိုရဲ့ဂိုးက) အံ့အားသင့်ဖွယ်ရာပါပဲ။ ဂျွန်နီ(အီဗန်စ်)ရဲ့ ပေးပို့မှုကလည်း တကယ်ကောင်းပါတယ်။ ကျွန်တော်က တိုက်စစ်မှူးတွေကို နောက်ခံ အတွင်းလူနဲ့ နောက်ခံအစွန်လူတွေအကြား နေရာလွတ်တွေရှာဖို့ အမြဲပြောပါတယ်။ ဒီဂိုး က Space ထဲကိုရောက်လာတဲ့ Great Ball တစ်လုံးပါပဲ။ ကျွမ်းကျင်မှုနဲ့အတူ လျင်မြန်စွာ အဆုံးသတ်ခဲ့တာပါ။ အတော်လေးအံ့အားသင့်စရာကောင်းတဲ့ ဂိုးတစ်ဂိုးပါပဲ။ သူ့(အီဟီယန်နာချို)အတွက် ကြီးမြတ်တဲ့ညတစ်ည ပါပဲ”ဟု ဘရန်ဒန်ရော်ဂျာက ပြောကြားခဲ့သည်။
အီဟီယန်နာချိုသည် လက်စတာအသင်းအတွက် နောက်ဆုံးယှဉ်ပြိုင်ကစားသည့် ပြိုင်ပွဲစုံ ၁၄ ပွဲတွင် ၁၄ ဂိုး သွင်းယူနိုင်ခဲ့ပြီး ၂၀၂၁ ခုနှစ်အတွင်း ပရီးမီးယားလိဂ်ကစား သမားများ၏ ပြိုင်ပွဲစုံ ဂိုးပါဝင်ပတ်သက်မှု တွင် စပါးတိုက်စစ်မှူး ဟာရီကိန်း(၁၈ ဂိုး) ပြီးလျှင် ၁၆ ဂိုးဖြင့် ဒုတိယအများဆုံးအဖြစ် ရပ်တည်လျက်ရှိသည်။
နာမည်ကြီးရုပ်သံဝေဖန်သူ ကာရေဂါက “သူ(အီဟီယန်နာချို) ဟာ ကွင်းအတွင်း အကောင်းဆုံးကစားသမားတစ်ယောက်အဖြစ် ကာလရှည်ကြာ ရှိနေမှာပါ။ လက်စတာအသင်းအကြောင်း ပြောရာမှာ ဂျေမီမာဒီ တစ်ဦးတည်းကို တည်ကစားတဲ့အသင်းလို့ ကျွန်တော်တို့ ပြောခဲ့ကြပါတယ်။ အခုချိန်မှာတော့ ဗာဒီရဲ့နေရာအတွက် အီဟီယန်နာချို ရှိလာပါပြီ။ သူက ဒါကို သက်သေပြပြီးသားလည်းဖြစ်ပါတယ်”ဟု ပြောကြားခဲ့သည်။