အင်္ဂလန်ပြည်တွင်းအမှတ်ပေးပြိုင်ပွဲများဖြစ်သော ပရီးမီးယားလိဂ်နှင့် ဘောလုံးလိဂ်ပြိုင်ပွဲများမှ ကလပ်အသင်းများသည် လူမှုကွန်ရက်ဝက်ဘ်ဆိုက်များအား တစ်ပြိုင်တည်း သပိတ်မှောက်ဆန့်ကျင်ရေးအတွက် တိုင်ပင်ဆွေးနွေးသွား မည်ဖြစ်ကြောင်း သိရသည်။
ပရီးမီးယားလိဂ်၊ လိဂ်ချန်ပီယံရှစ်၊ League One ၊ League Two ကလပ်အသင်းများမှ အဓိကရှယ်ယာရှင်များသည် လာမည့်ရက်ပိုင်းအတွင်း ယင်းကိစ္စနှင့် ပတ်သက်၍ တွေ့ဆုံဆွေးနွေးမည်ဖြစ်ပြီး လူမျိုးရေး/အသားအရောင်ခွဲခြားမှုများအား လူမှုကွန်ရက်ဝက်ဘ်ဆိုက်ကုမ္ပဏီများက ထိထိရောက်ရောက်အရေးယူမှုမရှိခြင်းအပေါ် ပြန်လည်တုံ့ပြန်ရန် စီစဉ်နေခြင်းဖြစ်သည်။
ပြီးခဲ့သည့်ရက်ပိုင်းက လိဂ်ချန်ပီယံရှစ်ကလပ် ဆွမ်ဆီးအသင်းသည် လူမှုကွန်ရက်ဝက်ဘ်ဆိုက်များအား တစ်ပတ်ကြာ ဆန့်ကျင်သပိတ်မှောက်သွားမည်ဟု ကြေညာချက်ထုတ်ပြန်ခဲ့ပြီး ယင်းအစီအစဉ်အား ပြီးခဲ့သည့်ဧပြီ(၈)ရက်နေ့ ညနေ(၅းဝ၀)နာရီ၌ စတင်ခဲ့သည်။
ဂျမေကာတောင်ပံကစားသမား ဂျာမဲလ်လိုဝီအပါအဝင် ဆွမ်ဆီးအသင်းမှ လူမည်းကစားသမားအချို့ကို လူမှုကွန်ရက်စာမျက်နှာများပေါ်တွင် လူမျိုးရေးခွဲခြားလှောင်ပြောင်မှုများရှိခဲ့ပြီး ဆွမ်ဆီးအသင်းက အသင်းအနေဖြင့်လည်းကောင်း၊ ဆွမ်ဆီးကစားသမားများအနေဖြင့်လည်းကောင်း လူမှုကွန်ရက်စာမျက်နှာများကို တစ်ပတ်ကြာ(၇ ရက်တိတိ)အသုံးမပြုဘဲ ဆန့်ကျင်သွားမည်ဖြစ်ကြောင်း ကြေညာခဲ့သည်။
ဆွမ်ဆီးအသင်းကြီးသာမကဘဲ ဆွမ်ဆီး ယူ-၂၃ အသင်း၊ ယူ-၁၈ အသင်း၊ ဆွမ်ဆီးအမျိုးသမီးအသင်း၊ ဆွမ်ဆီးအသင်းအားပေးသူများအဖွဲ့အစည်း၊ အသင်းဝန်ထမ်းများအားလုံး ပါဝင်ဆန့်ကျင်ကြမည်ဖြစ်ကြောင်း သိရသည်။
ဆွမ်ဆီးအသင်းက ယင်းကဲ့သို့ကြေညာပြီး မိနစ်ပိုင်းအကြာတွင်ပင် လိဂ်ချန်ပီယံရှစ်ပြိုင်ဘက်ကလပ် ဘာမင်ဂမ်အသင်းကလည်း ဆွမ်ဆီးအသင်းနှင့်အတူ ရပ်တည်မည်ဖြစ်ကြောင်း၊ မိမိတို့အသင်းအနေဖြင့်လည်း လူမှုကွန်ရက်စာမျက်နှာများကို တစ်ပတ်ကြာ ဆန့်ကျင်သွားမည်ဖြစ်ပြီး ဧပြီ(၈)ရက်နေ့ ညနေ(၆း ၀၀)နာရီ၌ စတင်မည်ဖြစ်ကြောင်း ကြေညာခဲ့သည်။
ထို့အတူ စကော့တလန်ကလပ် ရိန်းဂျားစ်အသင်းကလည်း ဆွမ်ဆီး၊ ဘာမင်ဂမ်အသင်းတို့ကဲ့သို့ လိုက်လံပြုလုပ်မည်ဖြစ်ပြီး ဆန့်ကျင်သည့် အစီအစဉ်ကို ဧပြီ (၈)ရက်နေ့ ည(ရး ၀၀)နာရီ၌ စတင်မည်ဖြစ်ကြောင်း ကြေညာခဲ့သည်။
ယခုအခါ အင်္ဂလန်လိဂ်ပြိုင်ပွဲများမှ ကလပ်အသင်းများက လူမှုကွန်ရက်ဝက်ဘ်ဆိုက်ကုမ္ပဏီများကို ပိုမိုသတိပေးရန်ရည်ရွယ်ပြီး အင်္ဂလန်လိဂ်ပြိုင်ပွဲအသင်းအားလုံး (ပရီးမီးယားလိဂ်=၂ဝသင်း + လိဂ်ချန်ပီယံရှစ်၊ League One ၊ League Two မှ ၂၄ သင်းစီ = ၉၂ သင်း)တစ်ပြိုင်တည်း ဆန့်ကျင်သပိတ်မှောက်ရန် စီစဉ်နေခြင်းဖြစ်သည်။
ယင်းကလပ်အသင်း (၉၂)သင်းက Facebook ၊ Instagram ၊ Twitter အစရှိသော လူမှုကွန်ရက်ဝက်ဘ်ဆိုက်များအား တစ်ရက်ကြာအသုံးမပြုဘဲ တစ်ပြိုင်တည်း သပိတ်မှောက်သွားကြမည်ဖြစ်ကြောင်း Daily Mail သတင်းစာက ဖော်ပြခဲ့သည်။
