မလေးရှားပရီးမီးယားလိဂ်ကလပ် ဆီလန်ဂေါ(ခ)အသင်း၏ မြန်မာလူငယ်လက်ရွေးစင်တောင်ပံတိုက်စစ်ကစားသမား ဟိန်းထက်အောင်သည် မလေးရှားဘောလုံးအဖွဲ့ချုပ်(FAM)က ချမှတ်ထားသည့် (၁) ပွဲပယ်ပြစ်ဒဏ်မှာ စေ့သွားပြီဖြစ်၍ ပွဲစဉ် (၇) တွင် ပြန်လည်ပါဝင်လာဖွယ်ရှိကြောင်း သိရသည်။
ဟိန်းထက်အောင်သည် မတ် (၆)ရက်က ကစားသည့် ဆီလန်ဂေါ (ခ) (၃-၀) PDRM အသင်းပွဲတွင် အနိုင်ဂိုးတစ်ဂိုးသွင်းယူပြီးနောက် လက်(၃) ချောင်းထောင်၍ အောင်ပွဲခံခဲ့သဖြင့် FAM စည်းကမ်းထိန်းသိမ်းရေးအဖွဲ့က (၁) ပွဲပယ်ပြစ်ဒဏ် ချမှတ်ခဲ့ခြင်းဖြစ်သည်။
ထို့ကြောင့် ဟိန်းထက်အောင်သည် ပြီးခဲ့သည့် ဧပြီ (၂)ရက်က ကစားခဲ့သည့် ပီရတ် (ခ) (၄-၃) ဆီလန်ဂေါ (ခ) ပွဲကို လွဲချော်ခဲ့ကြောင်း သိရသည်။
ဟိန်းထက်အောင်သည် ဆီလန်ဂေါ(ခ)အသင်း၏ ဧပြီ (၇) ရက်တွင်ကစားမည့် မလေးရှားပရီးမီးယားလိဂ်ပွဲစဉ် (၇)ဖြစ်သည့် ဆာရာဝပ်အသင်းနှင့်ပွဲတွင် ပြန်လည်ပါဝင်လာဖွယ်ရှိနေသည်။
