စပါးအသင်း၏ နည်းပြဖြစ်သူ မော်ရင်ဟိုက ဘန်လေအသင်းနှင့်ပွဲ တွင် စပါးအသင်းအတွက် ခြေစွမ်းပြ ကစားပြီး (၂)ဂိုးသွင်းယူပေးခဲ့သည့် ဂါရတ်ဘေးလ်ကို ချီးကျူးပြောဆိုမှုများပြုလုပ်ခဲ့ပြီး၊ ပုံမှန်ခြေစွမ်းသာ ပြနိုင်ပါက ကမ္ဘာပေါ်တွင် ဂါရတ် ဘေးလ်ကို မလိုချင်သည့် နည်းပြမရှိဟု ဆိုခဲ့သည်။
ဂါရတ်ဘေးလ်သည် ဒဏ်ရာ ပြဿနာများကြောင့် စပါးအသင်းတွင် အငှားဖြင့် လာကစားနေသည့် ကာလတစ်လျှောက် ပွဲထွက်ကစား ခွင့်ရသည်မှာ (၂)ပွဲသာရှိပြီး၊ ဘန်လေနှင့်ပွဲတွင် (၃)ပွဲမြောက်အဖြစ် ကစားခွင့်ရခဲ့ခြင်းဖြစ်သည်။
သူသည် ယင်းပွဲတွင် (၂)ဂိုးသွင်းယူကာ၊ (၁) ဂိုးဖန်တီးပေးနိုင်ခဲ့ပြီးနောက် မော်ရင်ဟိုက “တစ်ခါတလေတော့ လူတွေက မှန်တာတွေကိုရေးပြီး၊ တစ်ခါတလေတော့ စိတ်ကူးယဉ်ဇာတ်လမ်းတွေကို ရေးတတ်ပါတယ်။ ကျွန်တော်နဲ့ ဘေးလ် အဆင်မပြေဘူးဆိုတဲ့သတင်းတွေက အမှန်တရား မဟုတ်ပါဘူး။ ပြီးတော့ ဂါရတ်ဘေးလ်သာ အခုလို ကြံ့ခိုင်မှု၊ ခြေစွမ်းမျိုးနဲ့ဆိုရင် သူ့လိုကစားသမား ကို မလိုချင်တဲ့နည်းပြလည်း ကမ္ဘာမှာ မရှိပါဘူး။ ဂိုးတွေနဲ့ ဖန်တီးမှုကြောင့်တင်မဟုတ်ဘဲ ကြံ့ခိုင်မှုအခြေအနေ အတွက်ပါ ကျွန်တော် ဝမ်းသာပါတယ်”ဟု ဆိုခဲ့သည်။
သို့ရာတွင် ဂါရတ်ဘေးလ်ကို ပုံမှန်ကစားသမားအဖြစ် ဦးစားပေးအသုံးပြုသွားရန်မှာမူ မဖြစ်နိုင်သေးဟု ထင်ကြောင်းလည်း ၎င်းကဆိုခဲ့သည်။
