စပါးအသင်းသည် ဖီအိုရင်တီးနား အသင်းအား မကိုင်တွယ်ဖြစ်ဘဲ လမ်းခွဲခဲ့သည့် နည်းပြ ဂတ်တူဆိုနှင့် ဆွေးနွေးမှုပြုလုပ်ခဲ့သော်လည်း ပရိသတ်များက သဘောမတူသဖြင့် ခန့်အပ်ဖွယ်မရှိတော့ကြောင်း ဗြိတိန်မီဒီယာများ၏ဖော်ပြမှုအရ သိရသည်။
စပါးအသင်းသည် ပြီးခဲ့သည့်ရက်သတ္တပတ်က ရိုးမားအသင်းနည်းပြဟောင်း ပေါ်လို ဖွန်ဆီကာကို ခန့်အပ်ရန် သဘောတူညီမှု ရထားသော်လည်း ကြာသပတေးနေ့တွင် ဆွေးနွေးမှုများ ရပ်ဆိုင်း၍ ဂတ်တူဆိုကို ပြောင်းလဲကြိုးပမ်းလျက်ရှိကြောင်း သတင်းများ ထွက်ပေါ်ခဲ့သည်။
သို့သော် ဂတ်တူဆို သည် ယခင်က အမျိုးသမီးဘောလုံးလောက နှင့် လိင်တူလက်ထပ်မှုကို ဝေဖန်ပြောဆိုခဲ့ဖူးသဖြင့် စပါးအသင်းအားပေးသူ ပရိသတ်များအဖွဲ့က ၎င်းအား မခန့်အပ်ရန် #NoToGattuso လှုပ်ရှားမှုကို Twitter တွင် ပြုလုပ်နေခြင်းဖြစ်သည်။ သို့ဖြစ်ရာ စပါးအသင်းအနေဖြင့် ဂတ်တူဆိုနှင့် ဆွေးနွေးမှုပြုလုပ်ခဲ့သော်လည်း ခန့်အပ်ဖြစ်ဖွယ်မရှိတော့ကြောင်း ဗြိတိန်မီဒီယာများက ဖော်ပြခဲ့ကြသည်။
ဂတ်တူဆိုသည် နာပိုလီအသင်း နှင့် လမ်းခွဲပြီးနောက် ရက်ပိုင်းအကြာမှာပင် ဖီအိုရင်တီးနားအသင်း နည်းပြအဖြစ် ခန့်အပ်ခံရသော်လည်း အပြောင်းအရွှေ့ကိစ္စများနှင့် ပတ်သက်၍ အသင်းပိုင်ရှင်နှင့် အဆင်မပြေသဖြင့် ၂၃ ရက်အကြာမှာပင် ပြန်လည်လမ်းခွဲခဲ့ခြင်းဖြစ်သည်။
စပါးအသင်းမှာလည်း နည်းပြရာထူးအတွက် ရည်ရွယ်ထားသူ ခုနစ်ဦးအထိ အဆင်မပြေသေးဘဲ ဆက်လက်ရှာဖွေနေရဆဲ ဖြစ်သည်။
