မြန်မာလူငယ်တိုက်စစ်မှူး အောင်ကောင်း မာန် ကစားနေသည့် မလေးရှားစူပါလိဂ်ကလပ် ဆရီပါဟန်းအသင်းသည် လက်ကျန်ပွဲများအတွက် လေ့ကျင့်မှုပြန်လည်ပြုလုပ်နေပြီဖြစ်ကြောင်း သိရသည်။
၂၀၂၀-၂၀၂၁ ရာသီ မလေးရှားစူပါလိဂ် ပြိုင်ပွဲကို မေ ၉ ရက်ပွဲစဉ်များအပြီးတွင် ၂၀၂၂ ကမ္ဘာ့ဖလားခြေစစ်ပွဲ လက်ကျန်ပွဲများအတွက် နှစ်လကြာရပ်နားခဲ့ပြီး ကလပ်အသင်းများမှာလည်း လေ့ကျင့်မှုရပ်နားထားခြင်းဖြစ်သည်။ ဆရီပါဟန်းအသင်းသည် ပြိုင်ပွဲခေတ္တရပ်နားချိန်တွင် နှစ်ပတ်ကြာလေ့ကျင့်မှုရပ်နားခဲ့ သော်လည်း မေလစတုတ္ထပတ်မှစတင်ကာ ပြန်လည်လေ့ကျင့်နေခြင်းဖြစ်ပြီး ကြံ့ခိုင်မှုအပိုင်းကို ဦးစားပေးလေ့ကျင့်လျက်ရှိသည်။
“ကျွန်တော်တို့အသင်းကတော့ လေ့ကျင့်မှု ပြန်လည်လေ့ကျင့်နေပြီဖြစ်ပါတယ်။ ပြိုင်ပွဲ ပြန်လည်စတင်ဖို့ တစ်လကျော်လောက် လိုသေးတာကြောင့် နည်းပြကတော့ ကြံ့ခိုင်မှုအပိုင်းကို ဦးစားပေးလေ့ကျင့်နေပါတယ်။ အပြေးလေ့ကျင့်ခန်းတွေ တောက်လျှောက် ပြုလုပ်နေရပြီး တော်တော်ပင်ပန်းပါတယ်။ နည်းပြရဲ့ ကြံ့ခိုင်မှုလေ့ကျင့်ခန်းတွေပြီးရင်တော့ ကြံ့ခိုင်မှုဆိုင်ရာ တော်တော်တိုးတက်လာမယ်လို့ ထင်ပါတယ်”ဟု အောင်ကောင်းမာန်က ပြောကြားခဲ့သည်။
အောင်ကောင်းမာန် သွားရောက်ကစားနေသည့် မလေးရှားနိုင်ငံတွင် COVID-19 ကပ်ရောဂါကူးစက်မ ှုပြန်လည်မြင့်တက်လျက် ရှိသဖြင့် အသွားအလာကန့်သတ်မှုများရှိနေ ကြောင်း သိရသည်။ ထို့ကြောင့် ဆရီပါဟန်း အသင်းသည် ပါဟန်းမြို့$ မလေ့ကျင့်ဘဲ အခြားမြို့တွင် သွားရောက်လေ့ကျင့်လျက်ရှိသည်။ “ကျွန်တော်တို့ကလပ်အသင်း အခြေစိုက်တဲ့မြို့မှာ COVID-19 အနီရောင်အဆင့် သတ်မှတ်ထားလို့ တခြားမြို့မှာ သွားရောက် လေ့ကျင့်နေရပါတယ်။ ရောဂါဖြစ်ပွားတာတွေ ပြန်များနေလို့ သတိထားပြီး ကျန်းမာရေး လမ်းညွှန်ချက်တွေအတိုင်း နေထိုင်နေရပါတယ်” ဟု အောင်ကောင်းမာန်က ဆက်လက်ပြောကြားခဲ့သည်။
အောင်ကောင်းမာန်သည် ရာသီဝက် အပြောင်းအရွှေ့ကာလတွင် ဆရီပါဟန်း အသင်းသို့ ပြောင်းရွှေ့ခဲ့ခြင်းဖြစ်ပြီး ရာသီဝက် စာချုပ် ချုပ်ဆိုထားသည်။ အောင်ကောင်းမာန်သည် ဆရီပါဟန်းအသင်းအတွက် တစ်ပွဲသာကစားရသေးပြီး ပထမဆုံးပွဲမှာပင် ဂိုးသွင်းယူနိုင်ခဲ့သည်။ ဆရီပါဟန်းအသင်းသည် ပထမအကျော့အပြီးတွင် တန်းဆင်းဇုန်အတွင်း ကျရောက်ခဲ့သော်လည်း ပြိုင်ပွဲခေတ္တမရပ်နား မီ နောက်ဆုံးကစားသည့်ပွဲတွင် ပီရတ်အသင်း အား (၃-၂) ဂိုးဖြင့် အနိုင်ရခဲ့သဖြင့် ၁၃ ပွဲ ကစား၊ ရမှတ် ၁၂ မှတ်ဖြင့် အဆင့် ၉ နေရာ သို့ တက်လှမ်းနိုင်ခဲ့သည်။ မလေးရှားစူပါလိဂ် လက်ကျန်ပွဲများကို ဇွန် ၉ ရက်တွင် ပြန်လည်ကျင်းပမည်ဖြစ်သည်။
