လီဗာပူးလ် ၂-၀ ခရစ္စတယ်ပဲလေ့စ်
လီဗာပူးလ်အသင်းက ကြားရက်မှာ ဘန်လေကို (၃-၀)ဂိုးနဲ့ အနိုင်ရခဲ့တဲ့လူစာရင်းအတိုင်း ပွဲထွက်လာခဲ့ပြီး ရာသီပိတ်ပွဲစဉ်မှာ ဟန်ဒါဆန်ကတော့ အရန်လူစာရင်းမှာ ပြန်ပါလာခဲ့တယ်။ ရိုလာကိုစတာလို နိမ့်ချည်၊ မြင့်ချည်ရာသီတစ်ခုမှာ နောက်ဆုံးတော့ ကလော့ပ်နဲ့ လီဗာပူးလ်ကစားသမားတွေဟာ အောင်မြင်မှုလို့ မဆိုနိုင်ရင်တောင် နှစ်သိမ့်ချင်စရာ အရာတစ်ခုကိုတော့ စားသုံးခွင့်ရခဲ့တယ်။ ဘန်လေနဲ့ ပွဲပြီးကတည်းက ကိုယ့်ကြမ္မာကို်ယ်ဖန်တီးခွင့်ရခဲ့တဲ့ လီဗာပူးလ်က ဒီပွဲမှာလည်း သူတို့အလုပ်ကို သူတို့ ကောင်းကောင်းလုပ်ပြနိုင်ခဲ့တာတွေ့ရတယ်။
ကလော့ပ်နဲ့ လီဗာပူးလ်ကစားသမားတွေ ရင်ဆိုင်ခဲ့ရတဲ့ Professional နဲ့ Personal Challenge ကို သူတို့အားလုံး ကျော်ဖြတ်နိုင်ခဲ့ကြပြီး၊ ရာသီကုန်ရင် အသင်းကို နှုတ်ဆက်တော့မယ့် မီလ်နာ၊ ၀ိုင်နယ်လ်ဒမ်းတို့အတွက်လည်း လမ်းခွဲလက်ဆောင်ကောင်းတစ်ခု ဖြစ်ခဲ့တယ်။ ရာသီလက်ကျန်နှစ်ပွဲကို အကောင်းဆုံးပုံစံနဲ့ ပေးဂိုးမရှိ ဖြတ်သန်းနိုင်ခဲ့တဲ့ ယုံကြည်မှုနဲ့ အရှိန်အဟုန်က ဝက်စ်ဘရွန်းနဲ့ပွဲတုန်းက အယ်လစ်ဆန် ကယ်တင်ခဲ့တဲ့ မိနစ် (၉၀)သွင်းဂိုးကနေ အစပြုခဲ့တာဖြစ်ပြီး လာမယ့်ရာသီမှာ ချန်ပီယံ မန်စီးတီးကို ယှဉ်နိုင်ဖို့အတွက်ဆိုရင်တော့ တချို့နေရာတွေကို အားဖြည့်ဖို့ လိုပါတယ်။
ဒီပွဲမှာ ခရစ္စ တယ်ပဲလေ့စ်ရဲ့ တန်ပြန်တိုက်စစ်လမ်းကြောင်းတချို့ကို ခက်ခက်ခဲခဲ ကာကွယ်ခဲ့ရတာကို တွေ့ရ ပြီး လီဗာပူးလ်ကွင်းလယ်ဟာ အရင်လောက် မမာကျောတော့တာလည်း တွေ့ရတယ်။ ဒါပေမဲ့ သီယာဂိုဦးဆောင်တဲ့ ကွင်းလယ်က ဘောလုံးကို ကောင်းကောင်းကိုင်ကစားနိုင်သလို တိုက်စစ်ကစားသမားတွေအတွက် လမ်းကြောင်းကောင်းကောင်းတွေ ခင်းပေးနိုင်ခဲ့ပါတယ်။ လီဗာပူးလ်အတွက် အနိုင်ဂိုး(၂)ဂိုးစလုံးကို တိုက်စစ်မှူး မာနေက သွင်းယူခဲ့တာဖြစ်ပြီး အဖွင့်ဂိုးကို (၃၆) မိနစ်၊ ဒုတိယဂိုးကို (၇၄) မိနစ်တွေမှာ သွင်းယူခဲ့တယ်။
