လက်စတာ ၂-၄ စပါး
အာဆင်နယ်ပရိသတ်တွေက ဝင်ခွင့်မရချင်ဘူးလို့ဆိုနေကြတဲ့၊ စပါးပရိသတ်တွေကလည်း အာဆင်နယ်အသင်းကိုသာ ဝင်ခွင့်ပေးလိုက်ပါဆိုတဲ့ ကွန်းဖရန့်ဝင်ခွင့်တိုက်ပွဲမှာ စပါးက အာဆင်နယ်ကို အနိုင်ရခဲ့တယ်။ စပါးအသင်းရဲ့နိုင်ပွဲက သူတို့အသင်းကို ဥရောပရဲ့ တတိယတန်းစားပြိုင်ပွဲသစ်အတွက် ဝင်ခွင့်ရစေခဲ့လို့ အကျိုးရှိခဲ့တယ်ဆိုရင်တောင် လက်စ တာရဲ့ဆုံးရှုံးမှုကတော့ ကြီးမားပါတယ်။ အကျိုးအမြတ်အကြီးဆုံးရခဲ့တာက ဗီလာကို ရှုံးသွားခဲ့တဲ့ ချယ်လ်ဆီးအသင်းဖြစ်ခဲ့တယ်။ လက်စတာအသင်းအတွက်တော့ ရာသီပိတ်ပွဲစဉ်အပြီးမှာ ချန်ပီယံလိဂ်ဝင်ခွင့်ကို လက်လွှတ်ခဲ့ရတာ (၂) ရာသီဆက်ဖြစ်ခဲ့ပြီး ဒီတစ်ကြိမ်ကလည်း ပါးစပ်နားရောက်ခါနီး ထမင်းလုတ်ပြုတ်ကျခဲ့ခြင်းဖြစ်တယ်။
ဒါပေမဲ့ လက်စတာအသင်းရဲ့ ငွေကြေးအင်အား၊ လူအင်အားနဲ့ FA ဖလားကို အရယူပြီး အမှတ်ပေးပွဲမှာ အဆင့် (၅)ရခဲ့တယ်ဆိုတာ ကျေနပ်စရာဖြစ်ပြီး ဒီအသင်းရဲ့စိတ်ဓာတ်နဲ့ ခြေ စွမ်းက အသိအမှတ်ပြုသင့်ပါတယ်။ ဒီပွဲမှာလည်း စပါးအသင်းထက် အဖက်ဖက်ကသာအောင်ကစားနိုင်ခဲ့တာကို တွေ့ရတယ်။ တိုက်စစ်လမ်းကြောင်းကောင်းကောင်းတွေ ဖော် ဆောင်နိုင်ခဲ့သလို၊ ဆွန်ဟောင်မင်၊ ဟာရီကိန်းတို့ကို လှုပ်မရအောင်လည်း ကစားနိုင်ခဲ့တယ်။ ဒါပေမဲ့ ပြီးခဲ့တဲ့ပွဲတုန်းက ခံစစ်အထိုင် (၃)ဦးမှာ အီဗန်စ်ဒဏ်ရာရပြီး ထွက်ခဲ့ရတဲ့နောက်တည်ငြိမ်မှု ပျက်စီးသွားခဲ့သလို၊ ဒီပွဲမှာလည်း ခံစစ်အထိုင် (၃)ဦးထဲက ဖိုဖာနာ ဒဏ်ရာကြောင့် ထွက်သွားပြီးနောက်ပိုင်း အထိုင်ပျက်သွားခဲ့တာကို တွေ့ရတယ်။ လက်စတာရဲ့ ကံကြမ္မာကိုက တစ်ရာသီလုံး ဒဏ်ရာပြဿနာတွေနဲ့ ယဉ်ပါးနေရတဲ့ ဇာတာဖြစ်ခဲ့ပြီး ဒီအသင်းဟာ ဒီအခြေအနေမျိုးနဲ့ ဘာကြောင့် ဒီလောက်အထိ လုပ်နိုင်ခဲ့သလဲဆို တာကိုပဲ မေးခွန်းထုတ်ရမှာဖြစ်တယ်။
ဒီပွဲရဲ့အရေးပါတဲ့ အခိုက်အတန့်ကတော့ ဂါရတ်ဘေးလ် လူစားဝင်လာခဲ့တဲ့အချိန်ဖြစ်ပြီး စပါးအသင်းရဲ့ တိုက်စစ်ပိုင်း အထက်မြက်ဆုံးအချိန်လည်းဖြစ်ခဲ့တယ်။ စပါးက တစ်ရာသီလုံးလိုလို၊ တစ်ချိန်လုံးလိုလို ဒီလိုပါပဲ။ ကောင်းချင်တဲ့သူ ထကောင်း၊ မြူးချင်တဲ့သူထမြူးပြီး ပုံမှန်ခြေစွမ်းကို ထိန်းထားနိုင်ခဲ့တာ ဟာရီကိန်းနဲ့ ဆွန်ပဲ ရှိခဲ့တယ်။ ဆွန်တောင် မော်ရင်ဟို ထွက်သွားပြီးနောက်ပိုင်းမှာ တော်တော်လေး ငြိမ်သွားခဲ့တာကို တွေ့ရတယ်။ ဒါ့အပြင် မပါမဖြစ်အနေနဲ့ အရေးကြီးတဲ့ အချိန်တိုင်းမှာ ထထဖောက်တတ်လို့ မော်ရင်ဟိုကိုပါ လွင့်ထွက်သွားစေတဲ့ ခံစစ်ပိုင်းအမှားတွေကိုလည်း ဒီပွဲမှာ မြင်ခဲ့ရပြီး ပယ်နယ်တီ (၂)ကြိမ် ပေးခဲ့ရတယ်။
လက်စတာအသင်းအတွက် အဖွင့်ဂိုးကို ပယ်နယ်တီကနေ ဗာဒီက (၁၈) မိနစ်မှာ သွင်းယူခဲ့ပြီး၊ ဟာရီကိန်းက ကန်ချက်ကောင်းကောင်းနဲ့ (၄၁) မိနစ်မှာ ချေပဂိုးပြန်သွင်းတယ်။ နောက်တစ်ကြိမ် ပယ်နယ်တီကို ဗာဒီကပဲ (၅၂) မိနစ်မှာ ထပ်သွင်းခဲ့ပြီး (၇၆)မိနစ်မှာတော့ ဆွန်ဟောင်မင်ရဲ့ထောင့်ကန်ဘောက တိုက်ရိုက်ဝင်သွားခဲ့တယ်။ ကက်စပါရှမိုက်ကယ်ရဲ့ OG လို့လည်းပြောလို့ ရပါတယ်။ စပါးအသင်းအတွက် အနိုင်ဂိုးနှစ်ဂိုးကိုတော့ လူစားဝင်လာတဲ့ ဂါရတ်ဘေးလ်က (၈၇၊ ၉၀) မိနစ်တွေမှာ သွင်းယူခဲ့တယ်။
