မြန်မာ့ရိုးရာလက်ဝှေ့သမားဟောင်း မြနန်းတော်သည် ဖေဖော်ဝါရီ ၂၈ ရက်က မန္တလေးမြို့ လူထုဆန္ဒထုတ်ဖော်မှုတွင် ကျည်ဆန်ထိမှန်ခဲ့ပြီး လက်ရှိအချိန်တွင် ဒဏ်ရာအခြေအနေမှာ စိုးရိမ်စရာမရှိတော့ကြောင်း မန္တလေးမြို့ခံ လက်ဝှေ့သမားဖြစ်သူ ဖိုးသားကြီးက အတည်ပြုပြောကြားသည်။
လက်ရှိနိုင်ငံရေးအခြေအနေကြောင့် ပြည်သူလူထု၏ ဆန္ဒထုတ်ဖော်လှုပ်ရှားမှုများမှာ တစ်လခန့်ရှိလာပြီဖြစ်ပြီး တစ်နိုင်ငံလုံးအတိုင်းအတာဖြင့် ဆန္ဒထုတ်ဖော်လှုပ်ရှားမှုများ ပြုလုပ်နေခြင်းဖြစ်သည်။
အဆိုပါဆန္ဒထုတ်ဖော်လှုပ်ရှားမှုများတွင် အားကစားအသိုင်းအဝိုင်းမှ အားကစားသမားများလည်း ပါဝင်လှုပ်ရှားလျက်ရှိပြီး ရိုးရာလက်ဝှေ့နယ်ပယ်မှ လက်ဝှေ့သမားများ၊ နည်းပြများလည်းပါဝင်ကြောင်း သိရသည်။
ကျည်ဆန်ထိမှန်ဒဏ်ရာရရှိခဲ့သော လက်ဝှေ့သမားဟောင်း မြနန်းတော်သည် ဖေဖော်ဝါရီ ၂၈ ရက်က ပြုလုပ်ခဲ့သည့် လူထုလှုပ်ရှားမှုဖြစ်သော #MilkTeaAlliance တွင် ပြည်သူများနှင့် အတူ ပူးပေါင်းပါဝင်ခဲ့ခြင်းဖြစ်သည်။
မြနန်းတော်သည် ဖေဖော်ဝါရီ ၂၈ ရက် ညနေပိုင်းတွင် ကျည်ဆန်ထိမှန်ဒဏ်ရာရရှိခဲ့ခြင်းဖြစ် ပြီး ယာဘက်ပါးကို ဖောက်ဝင်သွားခြင်းဖြစ်သလို လက်တွင်လည်း ဒဏ်ရာတစ်ချက်ရရှိခဲ့ကြောင်း သိရသည်။
”ဒဏ်ရာကတော့ နှစ်ခုရခဲ့တာပါ။ ညာဘက်ပါးနဲ့ လက်ကို တစ်ချက်ထိခဲ့တာပေါ့။ဖြစ်ဖြစ်ချင်းမှာတော့ စိုးရိမ်ရတဲ့အခြေအနေလို့ ယူဆခဲ့တာကြောင့် အားလုံးကဝိုင်းပြီး စိုးရိမ်ခဲ့ကြပါတယ်။ လက်ရှိမှာတော့ လိုအပ်တဲ့ဆေးဝါးကုသမှုတွေကို ခံယူထားခဲ့ပြီဖြစ်တဲ့ အတွက် စိုးရိမ်ရတဲ့အခြေအနေမရှိတော့ဘူးလို့ ဆရာဝန်က ပြောကြားထားပါတယ်။ သူ (မြနန်းတော်)က လက်ရှိမှာတော့ ဆေးဝါးကုသမှု ခံယူနေဆဲဖြစ်ပါတယ်”ဟု မန္တလေး မြို့ခံလက်ဝှေ့သမားတစ်ဦးဖြစ်သူ ဖိုးသားကြီးက အတည်ပြုပြောကြားသည်။
ထို့ပြင် ပြီးခဲ့သည့်ရက်ပိုင်းက ဖမ်းဆီးထိန်းသိမ်းခံခဲ့ရသည့် လက်ဝှေ့နည်းပြတစ်ဦး ဖြစ်သူ ဦးအေးချို (ကော့သောင်း) မှာလည်း ဖေဖော်ဝါရီ ၂၈ ရက် ညပိုင်းတွင် ပြန်လည်လွတ်မြောက်လာကြောင်း သိရသည်။
ဖေဖော်ဝါရီလအတွင်းပြုလုပ်ခဲ့သည့် လူထုဆန္ဒထုတ်ဖော်မှုလှုပ်ရှားမှုများတွင် MNL ကလပ်များမှ ဘောလုံးသမားများနှင့် လက်ရွေးစင်ကစားသမားများ၊ လက်ရွေးစင်ဟောင်းများ၊ ဘောလုံးအသိုင်းအဝိုင်းနှင့် နီးစပ်မှုသူများ ပါဝင်လှုပ်ရှားခဲ့သလို အခြားနယ်ပယ်အသီးသီးမှ အားကစားသမားများတွင် ပါဝင်ခဲ့ကြောင်း သိရသည်။
ထို့ပြင် ၂၂၂၂၂ လှုပ်ရှားမှုဖြစ်သည့် ဖေဖော်ဝါရီ ၂၂ ရက် လူထုဆန္ဒထုတ်ဖော်မှုတွင်လည်း အားကစားလောကမှ အလွှာစုံပါဝင်သည့် အားကစားပေါင်းစုံသပိတ်စစ်ကြောင်းအဖြစ် လှုပ်ရှားခဲ့ပြီး ဘောလုံး၊ တိုက်ကွမ်ဒို၊ ကရာတေး၊ ခြင်းလုံး၊ Esports တို့အပါအဝင် အားကစားနည်းမျိုးစုံမှ အင်အား ၂၀၀ ခန့် ပါဝင်ကြောင်း သိရသည်။
