ပရီးမီးယားလိဂ်ပွဲစဉ်များတွင် ဝတ်စုံလဲသည့် ကစားသမားများရှိပါက ကစားသမားတစ်ဦးချင်းစီအတွက် ကလပ်အသင်းများက ပေါင် (၅၀၀၀) စီ ဒဏ်ရိုက်ခံရမည်ဖြစ်ကြောင်း သိရှိရသည်။
ဝတ်စုံလဲလှယ်ခြင်းအတွက် ကမ်းလှမ်းသူရော၊ လက်ခံသူပါ ကိုဗစ်စည်းမျဉ်းကို ချိုးဖောက်သည်ဟု သတ်မှတ်ပြီး နှစ်ဖက်ကစားသမားများ၏ ကလပ်အသင်းများသည် ဒဏ်ရိုက်ခံရမည်ဖြစ်သည်။
ယင်းအတွက်ကြောင့် ဝတ်စုံတစ်ကြိမ်လဲလှယ်တိုင်း ကလပ်အသင်းနှစ်သင်းက ပြစ်ဒဏ်ချမှတ်ခံရမည်ဖြစ်ကြောင်းလည်း သိရှိရသည်။
ပရီးမီးယားလိဂ်အဖွဲ့ချုပ်က COVID-19 တိုက်ဖျက်ရေး လုပ်ငန်းစဉ်များအတိုင်း ကလပ်အသင်းများထံသို့ ဒဏ်ငွေတပ်ရိုက်ခြင်းဖြစ်ပြီး ယင်းဒဏ်ကြေးငွေကို ကိုယ်တိုင်ပေးဆောင်ရန် သို့မဟုတ် ကစားသမားကို ပေးဆောင်ခိုင်းရန်အတွက်မူ ကလပ်အသင်းများကိုယ်တိုင်က ရွေးချယ်ရမည်ဖြစ်သည်။
ကလပ်အသင်းများကမူ ယင်းကဲ့သို့ စည်းမျဉ်းမျိုးကို COVID-19 တိုက်ဖျက်ရေးအဖွဲ့အစည်းများထံက တိုက်ရိုက်မလာဘဲ ပရီးမီးယားလိဂ်ကတစ်ဆင့် ကြားဝင်ဆောင်ရွက်ခြင်းအတွက် မေးခွန်းထုတ်ခဲ့ပြီး အချို့နည်းပြများကလည်း ဝေဖန်ခဲ့ကြသည်။
မန်စီးတီးအသင်းနည်းပြ ဂွါဒီယိုလာက ကွင်းအတွင်း မိနစ် (၉၀)ကြာထိတွေ့ ကစားဖူးသည့်ကစားသမားများအား ပွေ့ဖက်အောင်ပွဲခံခြင်းမပြုရန် တားမြစ်ခြင်းကို ဝေဖန်ခဲ့ဖူးသည်။
