ဘရိုက်တန်တိုက်စစ်မှူး မူပေးအား အွန်လိုင်းမှခြိမ်းခြောက်စော်ကားခဲ့သည့် စင်ကာပူနိုင်ငံတွင်နေထိုင်သူတစ်ဦးအား ဥပဒေကြောင်းအရ တရားစွဲဆိုရန် စီစဉ်နေကြောင်း ပရီးမီးယားလိဂ်တာဝန်ရှိသူများက ပြောကြားခဲ့ကြသည်။
၎င်းသည် ပြင်သစ်တိုက်စစ်မှူး မူပေးအား Instagram မှတစ်ဆင့် ရိုင်းပျသည့် မက်ဆေ့ချ်များ ပေးပို့ခဲ့ပြီး ခြိမ်းခြောက်မှုများလည်း ပြုလုပ်ခဲ့ကြောင်းသိရှိရသည်။
ပရီးမီးယားလိဂ်တွင် ယင်းကဲ့သို့ အွန်လိုင်းမှ ရိုင်းပျစွာ ဆိုးဆိုးရွားရွားတိုက်ခိုက်သူများကို ရှာဖွေဖော်ထုတ်သည့်စနစ်ထားရှိပြီး ယင်းစနစ်က ကျူးလွန်သူကို ဖော်ထုတ်ရန် အကူအညီပေးခဲ့ကြောင်း သိရှိရသည်။
ပြီးခဲ့သည့် ၂၀၂၀ သြဂုတ်လကတည်းက ဘရိုက်တန်အသင်းသည် ယင်းဖြစ်ရပ်အတွက် ပရီးမီးယားလိဂ်တာဝန်ရှိသူများထံ သတင်းပေးပို့တိုင်ကြားထားပြီး ယခုအခါ ကျူးလွန်သူအား အရေးယူနိုင်ရန်အတွက် ပရီးမီးယားလိဂ်အဖွဲ့ချုပ်က စီစဉ်နေကြောင်း သိရှိရသည်။
ဒဲရစ်နောင်ဒီရန်ဟုအမည်ရသောပုဂ္ဂိုလ်အား ဥပဒေအရ အရေးယူနိုင်ရန် ဒေသခံ စင်ကာပူရဲတပ်ဖွဲ့တာဝန်ရှိသူများနှင့် ပူးပေါင်းဆောင်ရွက်နေကြောင်း ပရီးမီးယားလိဂ်တာဝန်ရှိသူများက ပြောကြားခဲ့သည်။
