အင်္ဂလန်အသင်း၏တောင်ပံကစားသမား ဆန်ချိုက မိမိ ဘာလုပ်နိုင်သည်ဆိုခြင်းကို ဂျာမနီနှင့်ပွဲတွင် ပြသရန်အသင့်ဖြစ်နေပြီဟု ကြုံးဝါးပြောကြားခဲ့သည်။
ဆန်ချိုသည် ယခုပြိုင်ပွဲ၌တစ်ပွဲသာ လူစားဝင်ကစားခွင့်ရထားသူဖြစ်ပြီး ၎င်းကို နေရာမပေးခြင်းအတွက် နည်းပြ ဆောက်ဂိတ်ကို ဝေဖန်မှုအချို့လည်း ရှိနေသည်။
ဆန်ချိုက ” ပွဲကစားခွင့်ပိုရဖို့ ကျွန်တော် မျှော်လင့်နေပါတယ်။ ကစားခွင့်ရလာခဲ့ရင် ကျွန်တော် ဘာလုပ်နိုင်သလဲဆိုတာ အားလုံးကို ပြသသွားမှာပါ။ ဂျာမနီအသင်းမှာ ကျွန်တော်သိတဲ့ ကစားသမားတွေလည်း အများကြီးရှိပါတယ်။ သူတိုု့ ဘာလုပ်နိုင်လဲဆိုတာလည်း ကျွန်တော် သိထားပါတယ်”ဟု ပြောကြားခဲ့သည်။
ဆန်ချိုသည် ယခုယူရိုပြိုင်ပွဲ၌ ခရိုအေးရှားနှင့်ပွဲ အသင်းလူစာရင်းတွင် မပါဝင်ခဲ့ကာ စကော့တလန်နှင့်ပွဲတွင်မူ အရန်ခုံထိုင်ခဲ့ရပြီး ချက်နှင့် အုပ်စုပွဲ၌သာ ပွဲချိန် ၈၄ မိနစ်တွင် ဆာကာအစား လူစားဝင်ကစားခွင့်ရခဲ့သည်။
သို့သော် ဂျာမနီအသင်းနှင့် ရင်ဆိုင်ရခြင်းကြောင့် ဘွန်ဒစ်လီဂါ၌ ခြေစွမ်းပြနေသူ ဆန်ချိုကို ပွဲထွက်ကစားသမားအဖြစ် ဆောက်ဂိတ်က အသုံးပြုလာဖွယ်ရှိသည်ဟု မျှော်လင့်နေကြသည်။
ဆန်ချိုသည် ၂၀၁၇ ခုနှစ်ကတည်းက ဒေါ့မွန်အသင်းသို့ ရောက်ရှိနေပြီး လက်ရှိတွင် မန်ချက်စတာယူနိုက်တက်အသင်းသို့ ပြောင်းရွှေ့ရန် နီးစပ်နေသူဖြစ်သည်။
ဂျာမနီအသင်းနည်းပြဟောင်း ကလင်းစမန်းက အင်္ဂလန်အသင်းတွင် ဆန်ချို ကစားလျှင် ဂျာမနီအတွက် ကြောက်စရာကောင်းလိမ့်မည်ဟု သုံးသပ်ခဲ့သည်။
ဆန်ချို၏လက်ရွေးစင်အသင်းဖော် ရပ်ရှ်ဖို့ဒ်ကလည်း ဂျာမနီအသင်းကို အနိုင်ယူရာတွင် ဆန်ချိုမှာ အဓိကလက်နက်ဖြစ်မည်ဟု ခန့်မှန်းခဲ့သည်။
