ဗြိတိန်ဘုရင်မကြီး၏ ကြင်ယာတော်ဖြစ်သည့် ဖီးလစ်မင်းသား၏ စျာပနနှင့် အချိန်တိုက်နေသဖြင့် လာမည့်စနေနေ့တွင် ကစားမည့် ပရီးမီးယားလိဂ်ပွဲစဉ်များအား ပွဲကစားချိန် အပြောင်းအလဲပြုလုပ်သွားမည်ဖြစ်ကြောင်း သိရှိရသည်။
ဖီးလစ်မင်းသား၏ စျာပနအခမ်းအနားကို ဝင်ဆာရဲတိုက်တွင် လာမည့်စနေနေ့၌ ပြုလုပ်သွားမည်ဖြစ်ရာ အင်္ဂလန်ဘောလုံးလိဂ်အဖွဲ့ချုပ် (EFL) က ယင်းနေ့တွင် ကစားမည့် ပွဲစဉ်အားလုံးကို ဒေသစံတော်ချိန် ညနေ (၃)နာရီတွင် တစ်ပြိုင်နက်တည်းကစားရန် စီစဉ်ခဲ့သည်။
ယင်းအတွက်ကြောင့် ပရီးမီးယားလိဂ်အဖွဲ့ချုပ်ကလည်း စျာပနအခမ်းအနားကို ဂုဏ်ပြုသည့်အနေဖြင့် ယင်းနေ့ပွဲစဉ် အားလုံးကို EFL ကဲ့သို့ပင် ဒေသစံတော်ချိန် ညနေ (၃)နာရီတွင် တစ် ပြိုင်နက်တည်းကစားရန် စီစဉ်ခဲ့ခြင်း ဖြစ်ကြောင်း သိရှိရသည်။
ပရီးမီးယားလိဂ်ပွဲစဉ်များ၊ EFL လက်အောက်ရှိ လိဂ်ချန်ပီယံရှစ်၊ လိဂ် -၁၊ လိဂ်-၂ တို့ကဲ့သို့ပင် အခြားအား ကစားနည်းများသည်လည်း အချိန်အပြောင်းအလဲများပြုလုပ်ခြင်း၊ ပွဲစဉ်ဖျက်သိမ်းခြင်းများကို စီစဉ်နေပြီး အင်္ဂလန် ရပ်ဂ်ဘီလိဂ်ကလည်း လက်ရှိအချိန်တွင် အချိန်အတိအကျ မသက်မှတ်ရသေးသည့်တိုင် ညနေ (၃)နာရီ မှ (၄)နာရီအတွင်းဖြစ်မည်ဟု ကြေညာခဲ့ကြောင်း သိရှိရသည်။
ထို့ပြင် ချယ်လ်ဆီးအသင်းနှင့် မန်စီးတီးအသင်းတို့၏ FA ဖလား ပွဲစဉ်မှာလည်း မူလက စနေနေ့၊ ဒေသ စံတော်ချိန် ညနေ (၅)နာရီခွဲတွင် ကစားရန်စီစဉ်ထားရာမှ ယခုအခါတွင် ယင်းပွဲစဉ်ကို ရွှေ့ဆိုင်းရန် စီစဉ်နေသည်။ အချိန်အတိအကျမထွက်သေး သော်လည်း တနင်္လာနေ့သို့ ရွှေ့ဆိုင်း ဖွယ်ရှိနေသည်ဟု သိရှိရသည်။
