လိဒ်စ် – စပါး (မြန်မာစံတော်ချိန် မေလ ၈ ရက် ညနေ ၆:၀၀ နာရီ)
ရိုင်ယန်မေဆင်နဲ့ စပါးက လိဂ်ဖလားဗိုလ်လုပွဲမှာ မန်စီးတီးကိုရှုံးခဲ့ပေမဲ့ ပရီးမီးယားလိဂ်မှာတော့ နှစ်ပွဲဆက် နိုင်ပွဲယူနိုင်ခဲ့ပြီး၊ တိုက်စစ်ပိုင်းကလည်း ယုံကြည်လို့ရလာတယ်။ ကိန်းနဲ့ ဆွန်တင်မဟုတ်ဘဲ ဂါရတ်ဘေးလ်ဆီကပါ သွင်းဂိုးတွေ မျှော်လို့ရလာခဲ့ပြီး လက်ကျန် (၄)ပွဲစလုံးနိုင်ခဲ့ရင် ချန်ပီယံလိဂ်မျှော်လင့်ချက်ရှိဦးမှာပါ။ ရာသီပိတ်ပွဲကလည်း လက်စတာနဲ့ဖြစ်နေလို့ စပါးအားထည့်ကစားပြီး နို်င်ပွဲယူနိုင်လိမ့်မယ်ထင်တယ်။
ရှက်ဖီးယူနိုက်တက် – ခရစ္စတယ်ပဲလေ့စ် (မြန်မာစံတော်ချိန် မေလ ၈ ရက် ည ၈:၃၀ နာရီ)
ယာယီနည်းပြနဲ့ ရှက်ဖီးယူနိုက်တက်ကလည်း ဘာမှ ပြောင်းလဲမသွားဘူး။ ညံ့မြဲညံ့နေဆဲဖြစ်ပြီး ပရီးမီးယားလိဂ်ရဲ့အစောဆုံးတန်းဆင်းအသင်းဖြစ်ခဲ့တာလည်း ထိုက်တန်ပါတယ်။ ပဲလေ့စ်ကလည်း အမှတ်မလိုတော့တဲ့အသင်းဖြစ်ပြီး အစောပိုင်းတုန်းက အမှတ် လိုတဲ့အသင်းတွေကို ဒုက္ခပေးခဲ့ပေမဲ့ နောက်ပိုင်းပွဲတွေမှာ ရှုံးပွဲဆက်ခဲ့တယ်။ ဒါပေမဲ့ ပွဲကျပ်လို့ ရလဒ်ဆိုးတာကို သတိပြုရမှာဖြစ်ပြီး ဒီပွဲတော့ ရလဒ်ကောင်းပြန်ယူလိမ့်မယ်။
မန်စီးတီး – ချယ်လ်ဆီး (မြန်မာစံတော်ချိန် မေလ ၈ ရက် နံနက် ၁၁:၀၀ နာရီ)
မန်စီးတီးရော ချယ်လ်ဆီးရောက ဒီရာသီပရီးမီးယားလိဂ်မှာ Tactical ရှုထောင့်ကကြည့်ရင် လွှမ်းမိုးထားနိုင်ပြီး ပရီးမီးယားလိဂ်မှာ အကောင်းဆုံးလို့ ပြောလို့ရတဲ့အသင်းတွေလည်းဖြစ်တယ်။ နှစ်သင်းစလုံးက Flexible ဖြစ်တယ်။ ပြိုင်ဘက်တွေအပေါ် လွှမ်းခြုံနိုင်တယ်။ ခံစစ်ပိုင်းက Solid ဖြစ်တယ်။ မန်စီးတီးက အခွင့်အရေးဖန်တီးမှုနဲ့ တိုက်စစ်ပိုင်းမှာ ပိုအားသာသွားပြီး ကျန်တဲ့အပိုင်းတွေမှာ သိပ်မကွာဘူးလို့ ပြောလို့ရတယ်။ ဒါကြောင့် ထိပ်တိုက်တွေ့တဲ့အချိန်မှာ အမှားပိုများတဲ့အသင်းက ခံရတာပဲ။ ပြီးခဲ့တဲ့ FA ဖလား၊ ဆီမီးဖိုင်နယ်ပွဲမှာလည်း ချယ်လ်ဆီးက မန်စီးတီးကို ၅၀-၅၀ အားပြိုင်နေရင်း အခွင့်အရေးတစ်ချက်ကို အသုံးချပြီး အနိုင်ယူခဲ့တာဖြစ်တယ်။ ဒီပွဲမှာလည်း မန်စီးတီးက ပိုကောင်းတဲ့အသင်းဖြစ်ပြီး နိုင်ပွဲအတွက် ပိုအားသာတယ်ဆိုတာမှန်ပေမဲ့ ချယ်လ်ဆီးက ဒုက္ခပေးနိုင်စွမ်းရှိပါတယ်။ သရေဆိုရင် မန်စီးတီးချန်ပီယံလမ်းကြောင်းက မပျက်စီးနိုင်သလို၊ ချယ်လ်ဆီးအတွက်လည်းချန်ပီယံလိဂ်ဝင်ခွင့်အတွက် ကျေနပ်စရာဖြစ်လို့ သရေကျဖို့ များပါတယ်။
လီဗာပူးလ် – ဆောက်သမ်တန် (မြန်မာစံတော်ချိန် မေလ ၉ ရက် နံနက် ၁:၄၅ နာရီ)
လီဗာပူးလ်က လက်ရှိအနေအထားမှာ ချန်ပီယံလိဂ်ဝင်ခွင့်အတွက်တောင် စိုးရိမ်စရာဖြစ်နေပြီး၊ လိဒ်စ်၊ နယူးကာဆယ်တို့ကို ဆက်တိုက်သရေကျခဲ့တာက မဖြစ်သင့်တဲ့ ရလဒ်တွေလို့ ဆိုရမယ်။ ဒီတစ်ပတ် မန်စီးတီးနဲ့ ထိပ်တိုက်တွေ့တဲ့အချိန်မှာ ချယ်လ်ဆီး အမှတ်လျော့ပြီး လီဗာပူးလ်လည်းနိုင်ပွဲ ယူနိုင်ခဲ့ရင်တော့ မျှော်လင့်ချက်တွေ ပြန်အား ကောင်းလာနိုင်ပါတယ်။ လီဗာပူးလ် နိုင်ပွဲယူလိမ့်မယ်ထင်တယ်။
