မန်စီးတီး – လိဒ်စ် (မြန်မာစံတော်ချိန် ဧပြီလ ၁၀ ရက် ညနေ ၆:၀၀ နာရီ)
အမှတ်ပေးချန်ပီယံဖြစ်ဖို့ တဖြည်းဖြည်း နီးစပ်လာတဲ့ မန်စီးတီးအတွက်တော့ ရာသီလက်ကျန်ပွဲစဉ်တွေအားလုံးကို အမှားမခံဘဲ အခြားဖလားတွေအတွက် အပြည့်အာရုံစိုက်ဖို့ ကြိုးစားလိမ့်မယ်။ စာချုပ်သစ်ချုပ်ဆိုဖို့ ကြန့်ကြာနေတဲ့ ဒီဘရိုင်းနားကို စာချုပ်သစ်ချုပ်ဆိုနိုင်ခဲ့တာကလည်း အသင်းရဲ့ အဝတ်လဲခန်းကို ပိုမိုတက်ကြွလာစေလိမ့်မယ်။ လက်ရှိ မန်စီးတီးအသင်းက ရှေ့၊ လယ်၊ နောက် နေရာစုံမှာ အားကောင်းနေတဲ့အပြင် ဂွါဒီယိုလာ မျှော်လင့်ထားသလို ဘယ်ကစားသမားကိုသုံးသုံး အသင်းရဲ့စနစ်ကို ကောင်းကောင်းလည်ပတ်နိုင်တဲ့အနေအထားကို ရောက်လာတာလည်း တွေ့ရတယ်။ လိဒ်စ်ကတော့ တန်းတက်ဆိုပေမဲ့ ပရီးမီးယားလိဂ်အဆင့်မှာ ကောင်းကောင်းရပ်တည်နိုင်တဲ့အသင်းဆိုတာ ပြသနိုင်ခဲ့ပြီး ဘီယဲလ်ဆာရဲ့လက်အောက်မှာ အားကောင်းတဲ့အသင်းတစ်သင်းအဖြစ် ရှိနေတယ်။ ဒါပေမဲ့ မန်စီးတီးကို ရပ်တန့်ဖို့လောက်အထိတော့ မဖြစ်နိုင်သေးဘူး။ မန်စီးတီးပဲ အနိုင်ရမယ်။ ဂိုးလည်းပြတ်သွားနိုင်တယ်။
လီဗာပူးလ် – အက်စတွန်ဗီလာ (မြန်မာစံတော်ချိန် ဧပြီလ ၁၀ ရက် ည ၈:၃၀ နာရီ)
ပထမအကျော့တုန်းက အက်စတွန်ဗီလာအသင်းရဲ့ကွင်းမှာ ဂိုးတွေအများကြီးပေးပြီး လီဗာပူးလ်ရှုံးခဲ့တယ်။ ဒီပွဲက လီဗာပူးလ်အတွက် လက်စားချေရမယ့်ပွဲလည်းဖြစ်သလို၊ ချန်ပီယံလိဂ်ဝင်ခွင့်အတွက် အမှားမခံချိန်လည်း ဖြစ်တယ်။ အက်စတွန်ဗီလာကတော့ ဒီရာသီက ကျေနပ်စရာရာသီတစ်ခုလို့ဆိုရမှာပါ။ အခုအထိလည်း အားထည့်ကစားနေပြီး အမှတ်လိုနေတဲ့ ဖူလ်ဟမ်ကိုလည်း အနိုင်ယူခဲ့တယ်။ လီဗာပူးလ် ကပ်နိုင်ဖို့ ရှိတယ်။
ခရစ္စတယ်ပဲလေ့စ် – ချယ်လ်ဆီး (မြန်မာစံတော်ချိန် ဧပြီလ ၁၀ ရက် ည ၁၁:၀၀ နာရီ)
တူဟယ်လ်လက်ထက် ပထမဆုံး ရှုံးပွဲကို ပြီးခဲ့တဲ့ ပရီးမီးယားလိဂ်ပွဲစဉ်မှာ ချယ်လ်ဆီး ကြုံတွေ့ခဲ့တယ်။ ဒါပေမဲ့ ချယ်လ်ဆီးရဲ့ရာသီလက်ကျန်ပွဲတွေက သိပ်မကျပ်ဘူး။ ဒီပွဲပြီး ရင်လည်း အသင်းကြီးတွေနဲ့ တော်တော်တွေ့ဦးမှာမဟုတ်ဘူး။ ဒီပွဲမှာ ခြေမချော်သွားဘူး၊ စိတ်ဓာတ်မပျက်သွားဘူးဆိုရင် အမှတ်တွေ စုဆောင်းနိုင်မှာပါ။ ဒီပွဲမှာ ထပ်မမှားဖို့တော့ အရေးကြီးတယ်။ ချယ်လ်ဆီး နိုင်လိမ့်မယ်။
