အင်္ဂလန်လက်ရွေးစင် အသင်းခေါင်းဆောင်ဟောင်း ဒေးဗစ်ဘက်ခမ်ပူးတွဲပိုင်ဆိုင်သည့် မေဂျာလိဂ်ကလပ် အင်တာမိုင်ယာမီ အသင်းသည် လစာစည်းမျဉ်းချိုးဖောက်မှုကြောင့် စံချိန်တင်ဒဏ်ကြေး ဒေါ်လာနှစ်သန်း ချမှတ်ခံခဲ့ရကြောင်း သိရသည်။
အင်တာမိုင်ယာမီအသင်းသည် ၂၀၂၀ ပြည့်နှစ် သြဂုတ်တွင် ဂျူဗင်တပ်စ်အသင်းမှ ခေါ်ယူခဲ့သည့် ပြင်သစ်လက်ရွေးစင်ကွင်းလယ်လူ မာတွီဒီအား သတ်မှတ်လစာနှုန်းထားထက် ပိုမိုပေးချေခဲ့သောကြောင့် စံချိန်တင်ဒဏ်ကြေး ချမှတ်ခံရခြင်းဖြစ်သည်။
၂၀၂၁ ရာသီမှစ၍ မေဂျာလိဂ်ပြိုင်ပွဲတွင် ဘက်ခမ်စည်းမျဉ်းအရ လစာကန့်သတ်ချက်ထက် ကျော်လွန်ခွင့်ပြုသည့် ကစားသမား အရေအတွက်ကို သုံးဦးမှ လေးဦးသို့ တိုးမြှင့် ပေးထားသော်လည်း မာတွီဒီအား ခွင့်ပြုထားသည့် လစာနှုန်းထားထက် ပိုမိုပေးချေကြောင်း သံသယရှိသဖြင့် မတ်လတွင် စုံစမ်းစစ်ဆေးခဲ့ပြီး အပြစ်ရှိကြောင်း ထင်ရှားသဖြင့် ပြစ်ဒဏ်ချမှတ်ခဲ့ခြင်းဖြစ်သည်။
ထို့ပြင် အင်တာမိုင်ယာမီအသင်းအနေဖြင့် လာမည့် ၂၀၂၂ နှင့် ၂၀၂၃ ရာသီတွင် လစာပေးချေမှုအသုံးစရိတ်ကို ဒေါ်လာ ၂ ဒသမ ၂၇ သန်းသို့ လျှော့ချရမည်ဖြစ်ကြောင်း သိရသည်။
