ဗြိတိန်ရှိအားကစားကွင်းများတွင် လာမည့် ဇူလိုင်(၁၉) ရက်နေ့မှစတင်၍ ပရိသတ်များကိုအတားအဆီး အကန့်အသတ်မရှိ ယခင်မူလအတိုင်း ပြန်လည်ဝင်ခွင့်ပြုသွားမည်ဖြစ်ကြောင်း သိရသည်။
ဗြိတိန်အစိုးရသည် လာမည့် ဇူလိုင်(၁၉) ရက်နေ့အား ကိုရိုနာဗိုင်းရပ်စ် စည်းမျဉ်းစည်းကမ်းများကို စတင်ဖြေလျှော့ပေးသည့် Freedom Day အဖြစ်သတ်မှတ်ထားပြီး ပြည်သူများအနေဖြင့် ကိုရိုနာဗိုင်းရပ်စ်ကပ်ဆိုးကာလအတွင်း ချမှတ်ထားသော သတ်မှတ်ချက်စည်းကမ်းများကို လိုက်နာဆောင်ရွက်နေရခြင်းအား ရပ်တန့်နိုင်မည်ဖြစ်သည်။
ယင်းနေ့မှစ၍ ပြည်သူများအနေဖြင့် ပါတီပွဲများနှင့် လူအများသွားလာစုဝေးရာနေရာများသို့ မျက်နှာဖုံးများ မဝတ်ဆင်ဘဲ သွားလာခွင့်ရှိမည်ဖြစ်ပြီး အားကစားကွင်းများ၊ ဖျော်ဖြေရေးပွဲများတွင်လည်း ပရိသတ်များ (ကွင်းဝင်ဆံ့သလောက်) အကန့်အသတ်မရှိ ဝင်ရောက်ကြည့်ရှုခွင့်ရရှိမည် ဖြစ်သည်။
ဗြိတိန်ဝန်ကြီးချုပ် ဘောရစ်ဂျွန်ဆင်က ပြီးခဲ့သည့် တနင်္လာနေ့တွင် Freedom Day အဖြစ် သတ်မှတ်သည့် အစီအစဉ်နှင့် ပတ်သက်၍ အတည်ပြုခဲ့ပြီး အချို့သောလူပုဂ္ဂိုလ်များကမူ ယင်း ဖြေလျှော့ပေးသည့် အစီအစဉ်အား ဝေဖန်မှုများပြုလုပ်ခဲ့ကြသည်။ ဗြိတိန်တွင် ကိုရိုနာဗိုင်းရပ်စ်ကူးစက်မှုမှာ ပြီးခဲ့သည့် ဇွန်လမှ ပြန်လည်မြင့်တက်လာပြီး ပြီး ခဲ့သည့်ဇူလိုင်(၆)ရက်နေ့တွင် တစ်နေ့တာအတွင်း ကူးစက်မှုမှာ (၂၈၇၇၃)ဦးအထိ ရှိခဲ့သည်။
သို့ဖြစ်ရာ ကိုရိုနာဗိုင်းရပ်စ် ကူးစက်မှု အရှိန်မသေသေး ချိန်တွင် ယင်းကဲ့သို့ ဖြေလျော့မှု ပြုလုပ်ပေးခြင်းမှာ စိုးရိမ်စရာကောင်းကြောင်း၊ ယင်း Freedom Day အဖြစ် သတ်မှတ်သည့် ဇူလိုင်(၁၉)ရက်နေ့နောက်ပိုင်းတွင် ဗြိတိန်၌ တစ်နေ့တာအတွင်း ကိုရိုနာဗိုင်းရပ်စ် ကူးစက်မှုမှာ (၅၀၀၀၀)ကျော် အထိ ရှိလာနိုင်ကြောင်း ဝေဖန်မှုများ ထွက်ပေါ်လျက်ရှိသည်။
