ပြင်သစ်သမ္မတ အီမန်နျူရယ်လ်မက်ခရွန်က ချယ်လ်ဆီးကွင်းလယ်လူ ကွန်တေအား Ballon d’Or ရစေလိုသည်ဟု ပြောကြားခဲ့သည်။
ပြင်သစ်သမ္မတ မက်ခရွန်သည် ပြီးခဲ့သည့်ကြာသပတေးနေ့က ပြင်သစ်လက်ရွေးစင်အသင်း၏ လေ့ကျင့်ရေးကွင်းသို့ သွားရောက်လည်ပတ်ခဲ့ပြီး ကွန်တေကို ချီးကျူးမှုများ ပြုလုပ်ခဲ့ခြင်းဖြစ်သည်။
မက်ခရွန်က “ကွန်တေဟာ ဘာပေလိုပဲ ထိပ်တန်းကစားသမားဖြစ်ပါတယ်။ ပြီးတော့ သူက လူငယ်တွေအတွက် စံနမူနာယူစရာ ကစားသမားလည်း ဖြစ်ပါတယ်။ ပြီးခဲ့တဲ့ရာသီက ကလပ်အသင်းနဲ့အတူ ကွန်တေ အောင်မြင်မှုတွေရရှိခဲ့ပြီး Ballon d’Or ကိုလည်း သူ့အနေနဲ့ ရရှိဖို့ ကျွန်တော် မျှော်လင့်ပါတယ်။ ယူရိုပြိုင်ပွဲမှာ ကွန်တေအနေနဲ့ ခြေစွမ်းပြနိုင်မယ်လို့ ကျွန်တော် ယုံကြည်ပါတယ်”ဟု ပြောကြားခဲ့သည်။
မက်ခရွန်သည် ၂၀၁၈ ကမ္ဘာ့ဖလားမတိုင်မီကလည်း ပြင်သစ်လက်ရွေးစင်အသင်း၏လေ့ကျင့်ရေးကွင်းသို့ သွားရောက်လည်ပတ်ခဲ့ဖူးပြီး ယခုအကြိမ်တွင် အသင်းနည်းပြ ဒေးရွှမ့်နှင့် စကားလက်ဆုံကျခဲ့ကြောင်း သိရသည်။
ထို့ပြင် မက်ခရွန်က ပြင်သစ်အသင်းအား ယူရို-၂၀၂၀ ပြိုင်ပွဲတွင် ဆုဖလားယူပြီး ပြန်လာရန်နှင့် နိုင်ငံအတွက် ဂုဏ်ဆောင်ကြရန် တိုက်တွန်းခဲ့ကြောင်းလည်း သိရှိရသည်။
